Fór um hádegisbil frá Leesburg til Dulles-flugvallar við Washington til að fara þaðan með Continental um Newark til Rómar. Fluginu til Newark aflýst. Ákveð að fara til Baltimore og taka kvöldvél Flugleiða til Keflavíkur og halda þaðan áfram til Rómar.

Flaug síðdegis frá Keflavík til Baltimore og ók þaðan til Leesburg í Virginæiu á ársfund IISS.

Klukkan 10.15 hitti ég Luo Gan einn af níu  mönnum í stjórnmálaráði kínverska kommúnistaflokksins, en hann fer með yfirstjórn dóms- og lögreglumála í Kína. Var fundur okkar í 45 mínútur og fór fram í Þjóðmenningarhúsinu.

Klukkan 12.00 var ég gestgjafi Luo Gans í hádegisverði í Þjóðmenningarhúsinu. Áður en við settumst að borðum sýndi ég honum handritin. Lauk hádegsiverðinum um klukkan 13.00 og þá ákváðu öryggisverðir hans, að Luo Gan skyldi fara út um bakdyr Þjóðmenningarhússins, þar sem nokkur hópur manna hafði komið saman til að mótmæla en einnig Kínverjar á Íslandi til að fagna. Sást í sjónvarpi, að til einhverra stympinga kom milli Sigurðar A. Magnússonar, sem stóð með spjald á vegum Amnesty, og Kínverja með rauðan fána.

Klukkan 19.30 var ég í Kastljósi sjónvarpsins hjá Kristjáni Kristjánssyni og svaraði spurningum vegna Luo Gans og skipunar Ólafs Barkar Þorvaldssonar í hæstarétt.

Klukkan 15.00 kom Margareta Winberg, aðstoðarforsætisráðherra og jafnréttisráðherra Svíþjóðar, til fundar við mig í ráðuneytinu og ræddum við um samstarf til að sporna við vændi og verslun með fólk.

Borgarstjórnarfundir hófust að nýju að loknu sumarleyfi og stóð þessi fyrsti fundur frá klukkan 14.00 til 22.00. Ég skrapp frá í tvo tíma klukkan 16.00 til að flytja ávarp á fimm ára áfmælishátíð Háskólans í Reykjavík.

Klukkan 12.00 var ég í varðskipinu Tý við Ingólfsgarð í Reykjavíkurhöfn með starfsmönnum dómsmálaráðuneytisins. Hófst þar heimsókn til Landhelgisgæslunnar á hádegisverði. Síðan var haldið í höfuðstöðvar gæslunnar að Seljavegi 32 og kynntum við okkur starf í stjórnstöð hennar og sprengjueyðingarmanna. Loks héldum við á Reykjavíkurflugvöll og fórum meðal annars í ferð með þyrlunni Líf.

Um hádegisbilið héldum við Gunnar Eyjólfsson akandi frá Lónkoti og fórum yfir Þverárfjall á leiðinni til Reykjavíkur en þá leið hafði ég aldrei áður farið.

Ók snemma morguns af stað norður í Lónkot í Skagafirði til að hitta félaga mína við qi gong iðkun.

Komum heim frá Vilnius um kvöldið en höfðum fyrr um daginn farið þar í skoðunarferð til að sjá merki um grimmdarverk frá Sovéttímanum.

Við Rut héldum síðdegis með Icelandair til Kaupmannahafnar og þaðan áfram með Air Lithaen til Vilníus, höfuðborgar Litháens.

Klukkan 10.30 var ég á Garðatorgi í Garðabæ og flutti ávarp við upphaf átaks Garðabæjardeildar Rauða krossins og sveitarfélagsins til að efla öryggi íbúanna í heimahúsum og frítíma sínum. Hefur slíkt átak ekki verið skipulagt áður.

Síðdegis skrapp ég upp að Hrísbrú í Mosfellsdal, þar sem Jesse Byock bauð mér að skoða formleifagröft og rannsóknir, sem hann stjórnar. Lofa þær mjög góðu og vinnur öflugur hópur vísindamanna að verkinu.

Var klukkan 10.45 á Selfossi og flutti setningarræðu á ráðstefnu Nordisk Adminastrivt Forum.

Klukkan 17.00 var ég í Reykjavíkurakademíunni og opnaði vefritið Glíman, sem fjallar um kristilegt efni og er vistað á Kistan.is.

Klukkan 13.30 fór ég í heimsókn til lögreglunnar í Reykjavík, efndi til fundar með yfirmönnum, skoðaði einstakar deildir og ávarpaði lögreglumenn á setustofu þeirra, þar sem boðið var kaffi og kökur.

Klukkan 19.00 var ég í þættinum Ísland í dag og sat fyrir svörum hjá Árna Snævar vegna skipunar Ólafs Barkar Þorvaldssonar sem dómara í hæstarétt, sem ákveðin var daginn áður.

Á ríkisstjórnarfundi kynnti ég tillögu mína um, að Ólafur Börkur Þorvaldsson yrði dómari í hæstarétti.

Klukkan 09.30 hófst heimsókn mín til Fangelsismálastofnunar með skoðunarferð um fangelsið í Kópavogi, svonefnt Kvennafangelsi, sem hýsir bæði konur og karla. Þaðan var haldið í hegningarhúsið við Skólavörðustíg.  Þá var efnt til fundar í höfuðstöðvum stofnunarinnar við Borgartún. Eftir hádegi ókum við að Litla hrauni og vorum þar um tvær klukkustundir og átti ég meðal annars fund með fulltrúum trúnaðarráðs fanga.

Fyrir hádegi skoðuðum við þingmenn Sjálfstæðisflokksins fyrirtæki á Selfossi í miklu blíðskaparveðri, fórum fyrst í Mjólkurbú Flóamanna, þaðan tl Guðmundar Tyrfingssonar, þá í fyrirtækið BES, sem framleiðir efni í plastflöskur og loks til SGhúsa, þar sem menn sérhæfa sig í smíði flytjanlegra timburhúsa. Vorum við margs vísari, þegar við kvöddum Selfoss og héldum til einstaka veitingastaðar Hafið bláa við Ölfursárósa og fengum fiskisúpu auk þess að heilsa upp á Hannes, eiganda staðarins, sem var með sínu fólki að tína söl á rifi fyrir framan glugga veitingastaðarins.

Klukkan 15.00 hófst þingflokksfundur sjálfstæðismanna í Hótel Selfossi, þar sem rætt var um stjórnmálaviðhorf og málefni komandi þings fram að kvöldmat, sem síðan var snæddur sameiginlega og bættust þá fulltrúar heimanna í hópinn.

Síðdegis skrapp ég á flugvöllinn við Múlakot og fylgdist með hátíðinni þar, en fjöldi manna var þar með vélar af ólíkum tegundum og léku sumar listir sínar í háloftunum en aðrir stukku úr fallhlíf.

Fór klukkan 19.00 á samkomu í Kirkjulækjarkoti hjá hvítasunnufólkinu, nágrönnum mínum í Fljótshlíðinni, og naut þess vel að verja kvöldinu með þúsundum manna á góðri kristilegri samkomu, þar sem ég hlaut sérstaka blessun ásamt þeim Drífu Hjartardóttur alþingismanni og Ísólfi Gylfa Pálmasyni, fyrrverandi alþingismann.

Var í Skálholti fram eftir degi fór í staðarskoðun undir leiðsögn sr. Bernharðs Guðmundssonar og einnig í skoðun á fornleifagreftri undir leiðsögn bresks fornleifafræðings, áður en ég hélt aftur í Fljótshlíðina.

Hélt enn á ný í Skálholt - að þessu sinni úr Fljótshlíðinni - hlustaði á Rut leika með hinum nýja kvarttett  Ultima Thule verkið Sjö orð Krists á krossinum eftir Joseph Haydn, en fyrir tónleikana flutti Jaap Schröder fyrirlestur um verkið. Hlustaði einnig á Guðrúnu Óskarsdóttur semballeikara flytja verk eftir Bach. Kirkjan var þéttsetin á báðum tónleikunum.

Fór um kvöldið í Borgarleikhúsið og skemmti mér vel á Grease,

Tókum þátt í Skálholtshátíð og flutti ég ávarp á henni, en þess var minnst að 40 ár voru liðin frá vígslu kirkjunnar. Herra Sigurbjörn Einarsson biskup predikaði í messu af þessu tilefni. Héldum heim síðdegis,

Fórum síðdegis í Skálholt í boði herra Sigurðar Sigurðarsonar vígslubiskups og bjuggum þar í skólahúsinu.

Fór í kvöldgöngu á Þingvöllum undir leiðsögn Gylfa Gíslasonar myndlistarmanns, sem sagði tæplega 200 manns frá Þingvöllum í verkum myndlistarmanna. Veðrið var einstaklega fagurt en hitinn hafði farið í 26 stig þennan dag.

Vorum klukkan 15.00 á einleikstónleikum Helgu Ingólfsdóttur í Skálholtskirkju.

Fór fyrir hádegi í heimsókn í Umferðarstofu og hitti Karl Ragnars forstjóra og samstarfsmenn hans.

Klukkan 11.00 fór ég í heimsókn til Kjartans Þorkelssonar, sýslumanns á Hvolsvelli. Fyrst funduðum við með fulltrúum almannavarnaráðs og vísindamanna um áhættumat og hættugreiningu í Rangárþingi vegna hugsanlega eldsumbrota í Mýrdalsjökli eða Eyjafjallajökli. Þá kynnti ég mér starfsemi embættisins og lögreglunnar.

Eins og áður eru almennir viðtalstímar hjá mér í ráðuneytinu fyrir hádegi á miðvikudögum. Umræðuefnin eru annars konar en þegar ég sat í stól menntamálaráðherra.

Á ríkisstjórnarfundi var samþykkt tillaga mín um að farið yrði að óskum almannavarnarnefndar í Rangárþingi um tæplega 20 milljón króna fjárveitingu úr ríkissjóði til að gera áhættumat og hættugreiningu vegna hugsanlegra jarðelda í Goðabungu í Mýrdalsjökli eða Eyjafjallajökli.

Að loknum ríkisstjórnarfundi var haldið að Bessastöðum, þar sem ráðherrar voru í hópi þeirra, sem tóku á móti Johannes Rau, forseta Þýskalands.