Ég boðaði fólk til viðtala bæði fyrir og eftir hádegi þennan miðvikudag en vegna ýmissa anna undanfarnar vikur hafði bæst nokkuð á viðtalsbeiðnalistann, sem mér hefur almennt tekist að halda bærilega stuttum allt kjörtímabilið, þannig að ég vona, að það heyri til undantekninga, að menn þurfi að bíða um of eftir að komast á minn fund.

Klukkan 15.00 boðuðu stjórnmálafræðinemar við Háskóla Íslands fulltrúa stjórnmálaflokkanna til fundar í Háskólabíói. Logi Bergmann Eiðsson fréttamaður stjórnaði fundinum, sem stóð til 16.20 og byggðist á því, að við svöruðum spurningum fundarmanna.

Klukkan 14.00 flaug ég norður á Akureyri, þar sem ég ritaði undir samkomulag við fjármálaráðherra um fjárveitingar, 414 m.kr. á næstu fjórum árum, til að byggja við aðsetur Háskólans á Akureyri á Sólborgu. Verður nú hafist handa við fyrstu nýbyggingar fyrir skólann.

Landsfundinum lauk á sjötta tímanum. Í hádeginu var ég í þætti á Bylgjunni, sem Þór Jónsson fréttamaður stjórnaði, þar sem við Finnur Ingólfsson varaformaður Framsóknarflokksins fórum yfir stöðu mála með hliðsjón af helstu fréttum síðustu viku. Var ekki mikil samúð með samfylkingunni í máli okkar og taldi Þór það raunar aðeins formsatriði, að Sjálfstæðisflokkur og Framsóknarflokkur störfuðu áfram saman eftir kosningar með hliðsjón af áherslum í máli okkar. Ég sagði, að málið væri ekki svona einfalt, við ættum eftir að fara í kosningarnar, þær væru annað og meira en formsatriði. Í Morgunblaðinu þennan sunnudag er langt viðtal við Svavar Gestsson sendiherra, sem segist hafa lokað skoðanaverksmiðju (!) sinni. Ég sagði í þessum útvarpsþætti alltaf fagna því, þegar slíkum verksmiðjum sósíalista væri lokað, þær hefðu ekki framleitt merkilega vöru.

Fyrir utan að sitja landsfund allan daginn skrapp ég í stutta heimsókn í Perluna, þar sem KFUM og K héldu upp á 100 ára afmæli sitt.

Eftir að hafa setið landsfundinn allan daginn fórum við Rut klukkan 17.00 til athafnar, sem Mál og menning stóð fyrir í tilefni af 110 ára afmæli Þórbergs Þórðarsonar og kom það í minn hlut að afhenda Pétri Gunnarssyni stílverðlaun Þórbergs Þórðarsonar.

Alþingi frestað um 16.30. Landsfundur hefst klukkan 17.30. Klukkan 21.00 fundur um frjálsa þjóð í frjálsu landi.

Um kvöldið var boðað til fundar í Verði, fulltrúaráði sjálfstæðisfélaganna í Reykjavík, þar sem framboðslistinn vegna alþingiskosninganna var ákveðinn. Þar var ákveðið að Ásta Möller skipaði 9. sætið á listanum og var mikil sátt um það. Einnig er ástæða til að geta þess, að ég verð í 2. sæti listans, en Sigurdór Sigurdórsson blaðamaður hafði skrifað nokkrar „fréttir” í Dag til að skýra lesendum sínum frá því, að um þetta sæti stæði stór deila - hvergi varð ég var við hana. Minni ég enn á þau varnaðarorð mín, að menn taki ekki mark á öllu því, sem Sigurdór Sigurdórsson festir á blað, þótt það sé gert í búningi hlutlægra frétta.

Klukkan 13.00 hófst tveggja tíma fundur í Bláfjallasal útvarpshússins við Efstaleiti, þar sem talsmenn stjórnmálaflokkanna ræddu málefni Ríkisútvarpsins á fundi, sem starfsmannasamtök RÚV boðaði. Hófst fundurinn með ræðu Jóns Ásgeirs Sigurðssonar formanns samtakanna, þar sem hann lýsti andstöðu við að RÚV yrði breytt í hlutafélag eða yfirleitt að nokkrar markverðar breytingar yrðu gerðar á fyrirkomulagi á rekstri RÚV. Í ræðunni var gamalkunnugt nöldur í garð útvarpsráðs og vegna of mikilla afskipta stjórnmálamanna af stofnuninni eins og það stæði henni helst fyrir þrifum. Ég sagði eftir ræðu Jóns Ásgeirs, að mér þætti hún ákaflega gamaldags og skoðanir hans á framtíð RÚV úr sér gengnar, ættu þær að ráða fyrir RÚV væri fyrst ástæða til að hafa áhyggjur af framtíð þess miðað við alla þróun á þessu sviði. Bogi Ágústsson fréttastjóri stóð upp og lýsti því, að Jón Ásgeir talaði ekki nafni starfsmanna RÚV heldur væru þetta einkaskoðanir hans, sagði Bogi, að hann hefði stýrt hópi á vegum útvarpsstjóra, sem mælti með því, að RÚV yrði breytt í hlutafélag. Hið sama kom fram hjá Markúsi Erni Antonssyni útvarpsstjóra. Um kvöldið var ég fyrsti ræðumaður Sjálfstæðisflokksins í útvarpsumræðum frá alþingi. Í ræðu minni lagði ég áherslu á að draga skilin milli Sjálfstæðisflokksins og vinstrimennsku samfylkingarinnar. Halldór Ásgrímsson, formaður Framsóknarflokksins, kvað einnig fast að orði um samfylkinguna og vinstrimennsku hennar. Leiðtogi samfylkingarinnar, Jóhanna Sigurðardóttir, gerði kröfu um forsætisráðherrastólinn að kosningum loknum.

Í Degi birtist þennan dag við mig viðtal, sem Kolbrún Bergþórsdóttir skráði. Þáði ég boð Kolbrúnar um viðtal til þess að lesendur blaðsins fengju aðra vitneskju en þá, sem birtist í skrifum Sigurdórs Sigurdórssonar blaðamanns. Hinar svokölluðu pólitísku fréttir hans eru alltaf jafnlitaðar og skringilega skrifaðar. Um spádómsgáfu hans má vísa til þess, sem segir hér að ofan um þá Þorvald Gylfason og Ágúst Einarsson. Klukkan 10.00 fór ég á ráðstefnu Kvenréttindafélags Íslands um menntun kvenna. Flutti ég þar ræðuum hlut kvenna í skólastarfi. Er meginniðurstaða mín sú, að skólakerfið stæði á brauðfótum eða væri óstarfhæft ef kvenna nyti ekki við innan þess bæði sem kennara og nemenda. Klukkan 11.30 var athöfn á lóðinni þar sem Iðnskólinn í Hafnarfirði rís, þegar ég tók þar fyrstu skóflustungu. Klukkan 16.00 fórum við Rut á tónleika Sinfóníuhljómsveitar Íslands í Laugardalshöll, þar sem óperan Turandot var flutt af miklum glæsibrag.

Ísland er í formennsku í ráðherranefndum Norðurlandaráðs. Þess vegna kom það í minn hlut að stýra fundum í höfuðstöðvum ráðherranefndarinnar í Kaupmannahöfn þennan dag. Klukkan 10.30 hófst fundur menningarmálaráðherranna. Klukkan 11.00 hófst sameiginlegur fundur menningarmálaráðherranna og Nordenudvalget, sem er ein af höfuðnefndum Norðurlandaráðs. Voru fulltrúar nefndarinnar og embættismenn á fundinum milli 20 og 30 manns. Klukkan 12.15 hófst athöfn, þegar http://www.saamiweb.org var opnaður, það er vefur Sama, sem gerður hefur verið af samaútvarpinu. Kom það í minn hlut að flytja ræðu við þessa athöfn fyrir hönd ráðherranefndarinnar, en öllu var sjónvarpað beint út á netið og gátu Samar alls staðar í heiminum fylgst með þessum sögulega atburði. Síðan var sameiginlegur hádegisverður en klukkan 13.30 hófst fundur menntamálaráðherranna. Þar var sérstaklega rætt um tungumál og stöðu þeirra að ósk okkar Íslendinga. Rögvaldur Ólafsson, dósent við Háskóla Íslands, flutti erindi um tungutækni og hvernig það mál horfir við frá sjónarhóli Íslendinga. Var síðan skipst á skoðunum um málið og er ljóst, að menn nálgast það frá mismunandi sjónarhorni, því að eins og kunnugt er erum við Íslendingar eina þjóðin, sem fylgjum hreintungustefnu á Norðurlöndunum. Ráðherrunum þótti til dæmis fróðlegt að heyra um samning okkar við Microsoft og að við gætum gert kröfur um málfar við þýðingu á kerfisbúnaði fyrirtækisins. Fundir menntamálaráðherranna eru að þróast á þann veg, að þar fara fram mun meiri upplýsingaskipti en áður og er mjög gagnlegt að bera saman bækur á þennan hátt, því að menntakerfin eru sífellt að verða alþjóðlegri og standa ekki undir nafni nema þau standist alþjóðlegar kröfur. Flaug heim með kvöldvélinni. Allt stóð eins og stafur á bók hjá Flugleiðum í þessari ferð.

Flaug síðdegis til Kaupmannahafnar.

Klukkan 14.00 var ritað undir samning við GKS hf. um sölu á Skólavörubúðinni.

Klukkan 16.00 boðaði ég svokallaða stefnumótunarnefnd vegna námskrárgerðar til fundar í ráðuneytinu. Sigríður Anna Þórðardóttir hefur verið formaður hennar. Nefndin fór yfir álitamál vegna námskrárvinnunnar á upphafsstigum hennar og gerði tillögur til mín. Tilefni fundarins að þessu sinni var að skýra nefndinni frá stöðu mála og ljúka formlega störfum hennar, þar sem útgáfuferli námskránna er hafið. Var á fundinum staðfest hin víðtæka sátt sem er um allar meginákvarðanir í námskrárgerðinni.

Klukkan 13.00 fór ég í Vélskóla Íslands en þar var skrúfudagurinn haldinn hátíðlegur. Síðan var ég á ráðstefnunni UT99 og sleit henni klukkan rúmlega 16.00.

Fórum árdegis og skoðuðum skrifstofu ræðismannsins og ritstjórnarskrifstofur Lögbergs Heimskringlu. Síðan fórum við að þinghúsi Manitoba en fyrir framan það er stytta af Jóni Sigurðssyni forseta eins og sú sem er fyrir framan Alþingishúsið, stöpullinn er lægri undir styttunni í Winnipeg og nýtur hún sín betur fyrir bragðið. Ræddum við, að ekki væri úr vegi að lækka stöpulin á Austurvelli. Þá var ekið í rigningunni til Gimli, þar sem við heimsóttum Betel- elliheimilið og snæddum hádegisverð og ræddum við forystumenn í röðum V-Íslendinga. Um kvöldið var svo þorrablót.

Ráðstefnan UT99 um upplýsingatækni í skólastarfi hófst klukkan 13.15 í Menntaskólanum í Kópavogi. Klukkan 17.30 afhenti ég íslensku tölvuverðlaunin í fyrsta sinn við hátíðlega athöfn í Listasafni Íslands.

Síðdegis ritaði ég undir samning um að tveir grunnskólar í Vestmannaeyjum verði svokallaðir Globe-skólar, það er að þeir taki þátt í Globe-verkefninu, sem stofnað er til af Bandaríkjamönnum og miðar að fræðslu í umhverfismálum og samstarfi skólabarna um heim allan á því sviði. Klukkan 17.15 efndi málefnanefnd Sjálfstæðisflokksins um skólamál til fundar um námskrár og nýja skólastefnu. Var ég meðal frummælenda á fundinum.

Síðdegis fór ég með Guðmundi Magnússyni sagnfræðingi í Reykholt í Borgarfirði, þar sem við efndum til fundar með fulltrúum heimamanna. Kynntum við niðurstöður nefndar, sem Guðmundur stýrði um það, hvernig best verði staðið að því að styrkja Reykholt í sessi sem fræðasetur, þar sem áhersla er lögð á miðaldafræði. Var tillögum nefndarinnar vel tekið. Einnig fórum við yfir stöðu framkvæmda á staðnum og næstu skref.

Um kvöldið voru tónleikar Kammersveitar Reykjavíkur í Salnum í Kópavogi þar sem Rut og Erling Blöndal Bengtsson voru einleikarar.

Reglulegur fundur menntamálaráðuneytisins og skólameistara framhaldsskóla var haldinn þennan dag. Þar skiptust menn á skoðunum um nýja námskrá fyrir framhaldsskóla, sem tekur gildi á þessu ári. Klukkan 17.15 efndi málefnanefnd Sjálfstæðisflokksins um skólamál til almenns fundar um agamál í skólum.

Fór klukkan 14.00 og setti listahátíð fatlaðra og þroskaheftra í Ráðhúsinu. Fór klukkan 16.00 í Gerðarsafn, þar sem minningarsýning á málverkum Svölu Þórisdóttur var opnuð. Fór klukkan 18.00 í Laugarásbíó og opnaði íslenskan myndbandavef.

Umræður á alþingi um þrjú frumvörp um háskóla, það er um Háskóla Íslands, Háskólann á Akureyri og Kennaraháskóla Íslands.

Fórum í hádegisleikhúsið í Iðnó og sáum frumsýningu á leikritinu Leitum að ungri stúlku eftir Kristján Þórð Hrafnsson.

Upptaka á útvarpsþætti um grunnskólann undir stjórn Þrastar Helgasonar, þátturinn sendur út síðdegis fimmtudaginn 18. febrúar. Svaraði fjórum fyrirspurnum á alþingi.

Fór í 100 ára afmæli KR í Ráðhúsinu, flutti KR-ingum afmæliskveðju og tók á móti glæsilegri bók um félagið. Sáum leikritið Hinn fullkomni jafningi í Íslensku óperunni, þar sem Felix Bergsson bregður sér í mörg hlutverk.

Klukkan 9.15 kom það í minn hlut að setja málþing um menningararfinn, auðlind í ferðaþjónustu. Var ánægjulegt að sjá, hve margir sóttu þetta þing. Klukkan 11.30 var efnt til blaðamannafundar til að kynna framkvæmdir við Þjóðminjasafn Íslands sem munu standa fram til 17. júní 2001. Má segja, að unnið sé að því að koma upp tveimur söfnum á þessum tíma, því að allir munir safnsins verða ljósmyndaðir og settir inn á netið samhliða því sem búið verður um safnið með nýjum hætti. Klukkan 17 fór ég í viðtal á rás 2 um stjórnmál, þá ræddi ég einnig við fréttamann um nýtt frumvarp til laga um Háskóla Íslands. Hjálmar Árnason, þingmaður Framsóknarflokksins, hafði látið orð falla daginn áður, sem mátti skilja á þann veg, að ég hefði farið á bakvið þingflokk framsóknarmann við framlagningu frumvarpsins. Þetta er ekki rétt og leiðrétti ég það. Þá ræddi ég einnig við fréttamann um lyktir málaferlanna yfir Bill Clinton og birtist það í fréttaauka klukkan 13 laugardaginn 13. febrúar.

Klukkan 15.30 var umræða utan dagskrár um húsnæðismál Nemendaleikhússins að ósk Steingríms J. Sigfússonar. Var hálfeinkennilegt að hlusta á þingmenn stjórnandstöðunnar flytja skrifaðar skammarræður um mál, sem hafði verið leyst með farsælum hætti og samkomulagi allra aðila.

Síðdegis hitti ég fulltrúa fjórða árs nemenda í Leiklistarskóla Íslands, sem höfðu daginn áður efnt til útifundar vegna þess, að þeir töldu, að það ætti að úthýsa sér úr Lindarbæ. Hafði málið ekki verið lagt fyrir mig áður. Eftir samtal okkar ræddi ég við Hallgrím Snorrason hagstofurstjóra og fannst þá strax lausn á málinu. Var ritað undir samkomulag um það daginn eftir.

Klukkan 10 fórum við Jónína í menntamálaráðuneytið í Varsjá og hittum menntamálaráðherrann og samstarfsmenn hans. Ræddum við samskipti þjóðanna í menntamálum. Klukkan 12 var athöfn í bókmenntakynningarsafninu, þar sem ég opnaðisýninguna um Halldór Laxness. Menningarmálaráðherra Póllands bauð okkur síðan í hádegisverð. Þaðan fórum við beint út á flugvöll og komum heim um kvöldið í gegnum Kaupmannahöfn.