Mánudagur, 02. 06. 08.

Styrmir Gunnarsson kveður ritstjórastól Morgunblaðsins í dag. Ég þakka honum samfylgd og vináttu í áranna rás. Við vorum ekki alltaf sammála en vináttan slitnaði ekki, þótt á reyndi. Ég óska Ólafi Þ. Stephensen heilla við ritstjórn hans.

Íslensk blaðamennsk hefur ekki batnað og hún mun enn dala hratt, ef hún tekur mið af bloggi síðari ára. Fráleitt er að elta bloggsíður á prenti eða halda að blöð batni með vísan til þeirra. Stíll og efnistök eru gjörólík milli miðla. Styrmir hefur gert margt gott og haldið ýmsu í horfinu á Morgunblaðinu. Hann hefur einnig gefið eftir, án þess að blaðið batnaði. Sú árátta að fjarlægjast Sjálfstæðisflokkinn hefur ekki orðið til að fjölga áskrifendum blaðsins, þeim hefur þvert á móti fækkað. Áskriftarblöð þurfa að hafa skýran markhóp, eins og allir, sem bjóða eitthvað til sölu.

Í raun er sorglegt, að metnaðarfull ritstjórnarstefna Morgunblaðsins hafi lent í glímu við lágkúru Jónasar Kristjánssonar. Fyrir Morgunblaðið er þó huggun harmi gegn, að Jónas kúldrast nú með sérvisku sína á eigin vefsíðu, af því að honum hefur verið úthýst annars staðar.

Að Jónas telji sig meira lesinn á eigin síðu en í þeim blöðum, sem hann ritstýrði, lýsir best, hve hátt verð menn urðu að gjalda fyrir störf hans. - Blöðin, sem hann ritstýrði, eru líka öll úr sögunni í sinni fyrri mynd.

Það er ein af þversögnum samtímans, að Jónasi skuli hafa verið falið að halda námskeið um blaðamennsku. Kannski er það vísasti vegurinn til að grafa undan marktækum fjölmiðlum í landinu - eða hvað?

Hörður Sigurgestsson fagnaði 70 ára afmæli í dag og flutti ég honum heillaóskir af því tilefni.

Fréttablaðið vísar til þess, að ég hafi ekki talið skynsamlegt, að Orkuveita Reykjavíkur ræki tetra-fjarskiptakerfið, og síðan þeirra orða minna, að kerfið hafi gefið góða raun í jarðskjálftunum 29. maí. Telur blaðið þessi viðhorf ósamrýmanleg. Staðreynd er, að þá fyrst komst rekstur tetra í lag, þegar orkuveitan var víðs fjarri rekstrinum.